A ciamarla la me tera

se a penso che i me amighi

quando c'a zugava con luri

da putin i me ciamava el terón

Ma non l'è el sangue

quelo ch'el te tien tacà

a chel toco de tera dura

le xé le to raìse

le to raìse e la fumana de la to pianura

I to ricordi che i te scapa par ogni cantón

le strade c'a te fasevi in bicicleta

le to corse in t'el campo da balón

n'aria c'a te stofegava

n'umidità maledeta

Le me raìse le xé lì

in te chel paese ciucià

distirà su l'arzene del Canal Bianco

le xé lì parché lì a gh'é i me ani più straordinari

le sere soto i tigli

le istà pasà a rampegarse su par i persegari

Le domeneghe a tacarse con Don Piero

a zercar de farghe capire

in te le maniere più diverse

c'a volea esare quelo c'a giero

un poteleto zovene con tanta voia de divertirse

L'è sempre la me tera

anca s'a son lontàn

parché a no gh'è raìse più vere

dei ricordi che dal cuore i te vien su pian pian

e rivando ai oci i te fa pianzare le lagreme più leziere